لمحة من الماضي

فاكر اول مرة كلمتك فيها .....كان الهدف من الموضوع كله ان اثبتلك انك اكيد مش منحوس (اللي يشوف بلاء الناس يهون عليه بلوته) ....المهم المرة ديه هحاول افتكر النحس ابتدى معايا من امتى......تعالى نرجع بالزمن 18 سنة للخلف و انا عندي 4 سنين....او يمكن اقل!!!

الابطال: كتيير المرة ديه مش فاضي اكتبهم.

الزمان: مافيش وقت محدد.

الاحداث: مش عارف ابتدي ازاي تعالى نفتكر سوا كم مشهد من حياتي مع بعض:

المشهد الاول:

- الحق يا دكتور المريضة في 517 عندها نزيف حاد من بعد الولادة.

- مش ديه اللي ولدت ولد ؟؟

- ايوة يا دكتور!

- ربنا معاها , ده المستشفى بيحصل فيها حاجات غريبة من ساعة الولد ده ما وصل.

- ازاي يعني؟؟؟

- مش عارف الكهرباء قطعت و زميلنا زوجته ماتت في حادثة عربية و 3 مرضى ماتوا مرة واحدة في العناية لمركزة.

- المهم نلحق المريضة بس قبل ما النحس يوصلها.

- يللا بينا.

( طبعا احداث تنبأ بمولد طفل غير عادي).

المشهد الثاني:

كان عندي 4 سنوات ساعتها , تعالى عيش معايا المشهد من وجهة نظري و انا صغير.

- ماما ...ماما انا عايز عصيل (عصير ) ماليش دعوة.

- مش وقته يا ابني انا مش فاضية لك.

(طبعا هما فاكرين انهم ممكن يخبئوا العصير مني, مش عارفين بيتعاملوا مع مين) قعدت اقلب البيت كله ادور على العصير , المطبخ ,البلكونة, السفرة ,الانتريه, غرف النوم كل ده و مش لاقي العصير, مش فاضل غير مكان واحد بس.......

الحمام......ازاي ديه كانت تايهة عني....اكيد في الحمام.....دخلت الحمام و قلبت الدنيا.....

و اخيرا.....زجاجة العصير قدامي خلاص...صحيح شكلها مختلف بس اكيد هي....صحيح مكتوب عليها بالانجليزي بس يمكن مستوردة....صحيح رائحة العصير اللي جوة غريب بس اكيد هي....

مسكت الزجاجة الابيض في ازرق و فتحت الغطاء و قفلت انفي عشان الرائحة كانت اقوى من الازم و ابتديت اشرب (ياه العصير ده مال طعموا حراق كدة ليه, بس على مين هشربه بالعند فيهم), خلاص شربت لحد لما الزجاجة خلصت لنصفها و ابتدى وجهى يحمر (الظاهر كان عصير فراولة) ان الاوان بقى اخرج من الحمام و اروح عشان اغيظ اهلي....

طبعا خارج مش شايف قصادي ( ايه يا جدعان انا شربت ايه بالظبط) وو جهى احمر و رايح لوالدتي:

- ماما انا عرفت العصيل فين و شربت منه (مع اخراج جزء من اللسان و تحريكه لابراز المعنى)

- انهى عصير يا ابني احنا معندناش عصير اصلا في البيت؟؟؟؟؟؟ (هاهاهاهاها, على مين)

- لا فيه و انا عرفت انت بتخبيه فين (المرة ديه اخراج اللسان كله و زيادة سرعة التحريك للتاكيد على المعنى الاول)

- طب تعالى وريني كدة (اخيرا اعترفوا بالهزيمة!!!)

- خدت والدتي و دخلت الحمام و بمنتهى الفخر و زهوة الانتصار قلتلها على مكان الزجاجة.

- الحقونييييييييييييييييييييييي , ابني شرب كلور يا ناس اعمل ايه؟

طبعا الجيران وصلوا و قالوا لازم غسيل معدة بسرعة (لا , ماحدش هيطلع العصير مني ابدا)

المشهد الثالث:

برضه لسة عندي 4 سنين بس المرة ديه كنت في البلد و ماشي مع والدي هناك , و ببص جنبي لاقيت بط ووز ماشين جنبي و في جزء منهم ماشي في ممر شكله غريب كدة و لونه بني غامق!!!!

المهم طبعا انا ماشي ووالدي ماسك ايدي و طبعا برضه عايز اسيب ايده و العب مع البط و بالذات اللي ماشي في الممر البني اللي قلتلكم عليه !!!

بعد محاولات كثيرة جدا نجحت و الحمد لله في اني افك ايدي من ايد والدي و مسكت عصاية خشب من الارض و طلعت اجري ورا البط , و هروبا من غدادتي البط نط في الممر ده (اللي كان بالمناسبة مستواه منخفض عن الارض اللي حواليه), طبعا لم اتردد نطيت ورا البط بسرعة قبل ما والدي يمسكني و كانت المفاجأة !!!!!!!!!

الارض البنى ديه غريبة جدا عاملة زي ما تكون ماء بس انا طول عمري اعرف ان الماء شفاف.

- الحقونييييييييي يا ناس ابني نط في الترعة !!!!!!!!!

و طبعا تم انقاذي بعد مساعدات الاهالي و تدخل رجال الشرطة (و البط ساعد في الموضوع برضه).

المشهد الرابع:

صاحي من النوم الصبح و مافيش حد في البيت غير الخدامة و كمان نايمة , لا و ايه نومها تقيل جدا , ماما في الشغل و اخواتي في المدارس, طب اشمعنى انا ماروحتش المدرسة هو يعني لازم يبقى عندى 5 سنين طب ده انا دماغي توزن بلد , و المرة ديه هثبتلهم ان انا كبير و لقدر اعمل حاجات جامدة جدا !!!1

اعمل ايه ......اعمل ايه ......أيوة لاقيتها ......اغسل السجاجيد.!!!!!!!

اخدت السجادة اللي في الطرقة على الحمام بس كان فيه مشكلة كبيرة جدا ........... ما فيش صابون ......قلبت البيت كله ادور على الصابون ......لحد لما لاقيت الصابون في البوفيه (مش عارف ايه اللي وداه هناك) و كان شكله عبارة عن مكعبا ت صغيرة بيضاء .............

المهم قعدت اغسل السجادة في الحمام (كل ده و الخدامة نايمة) , و بعد ما خلصت صفيت الحتة اللي غسلتها في السجادة و حطيتها مكانها تاني ......

و جه وقت المكافأة , ماما رجعت من الشغل ( مش هقولها حاجة ,هي لازم تكتشف بنفسها) ..........

- هشااااااااااااااااااام........

- نحم يا ماما.............

- انت عملت حاجة في السجادة ديه؟؟؟؟

- بمنتهى السعادة: انا غسلتهالك يا ماما...

- نعم , غسلتها طب هي مالها بتلزق كدة ليه؟؟؟, و بعدين جبت صابون منين انا مخبية كل الصابون منك (راجع تاني مشهد عشان تعرف ليه)

- ما انا لاقيته في البوفيه لا تقلقي.

- تعالى وريني جبته منين

- حاضر.... اهو من هنا.....

- الله يخرب بيتك ده سكر مكعبات.......انت مش ناوي ترحمني بقى !!!!!!.

المشهد الخامس:

المرة ديه والدي واخدنا زيارة لواحد صاحبه ...... و في الطريق وقفنا نجيب جاتوه ( يا سلام و الله والدي ده فيه الخير, خرجنا و كمان جابلنا حاجة حلوة) بس فيه حاجة مفهمتهاش ليه جايب العلبة مقفولة و متغلفة؟؟؟؟

المهم روحنا للناس لاقيت والدي طالع بالعلبة (اكيد هيشلها في التلاجة عندهم عشان ميحصلهاش حاجة) , الناس خدوه العلبة و حطوها في المطبخ , طبعا عشان انا بحب والدي و عايز احافظله على فلوسه فضلت طول القعدة كل شوية ادخل المطبخ اطمئن على ان الحاجة موجودة.... لحد لما جينا خلاص ماشيين......

- بابا ....بابا....انت نسيت علبة الجاتوه بتعانا!!!!

- اسكت يا هشام مش ناقصة فضايح......

- لا ما ليش دعوة ....انا عايز الجاتوه بتاعنا.....

- يا ابني ده احنا جبناه للناس مش لينا...

- لا ده بتاعنا و انا عايزه ماليش دعوة....

من هنا لهنا الموضوع خلص على ان الناس انا صعبت عليهم و ادوني قطعة جاتوه في ايدي و انا ماشي (او الصح ان انا اللي تنازلتلهم عن الباقي)

تفتكروا كنت طفل عادي......تفتكروا ايه السبب.....على العموم اهلى هما اللي حظهم كدة هما اللي ابنهم طلع منحوس........

عبده منحوس