3abdo man7os 2

عبده منحوس في رحلة !!!!!!!
فاكرني ...... انا الراجل المنحوس بتاع التنسيق و كلية تجارة و كده.
كنت و عدتك اني هحكيلك حكايات نحس كمان....... بس المشكلة ان الوقت لايسمح اني احكيلك كل حاجة.
مش هحكيلك الحاجات الصغيرة اللي بتعدي عليا في الحياة...... مش هحكيلك ان لازم لما انزل اشتري حاجة للبيت لازم تكون خلصت من المحلات اللي جنبنا و لازم اروح اجيبها من اخر الدنيا .....مش هحكيلك اني كل لما اتصور في استوديو و اروح استلم الصور لازم الراجل يقولي اصل الكهرباء قطعت امبارح تعالى خد الصور بكرة.....مس هحكيلك اني كل لما اجي اشتغل في حاجة لازم تتلغي او تتعقد لاقصى درجة قبل ما تتم.
كل ديه حاجات صغيرة ممكن لو حكيتهالك تفتكرني بكبر الموضوع زيادة عن اللزوم.
تعالى النهاردة احكيلك حكاية جديدة, حلقة جديدة من مسلسل النحس يمكن تتعظ و تعرف انك اكيد احسن حالا مني!!!!
الزمان: العام النهائي لكلية صيدلة جامعة القاهرة الترم الاول.
الابطال: اتوبيس الرحلة, الفرامل, اصحابي و طبعا العبدلله.
الاحداث:
يا سلام ......اخر سنة لي في الكلية, ناقص كام شهر و اتخرج و ارتاح من التعليم و اتنقل لمرحلة جديدة من النحس (الجيش و الشغل و الحاجات ديه).
المهم....اصحابي قالولي: ما تيجي نطلع رحلة؟؟؟ احنا اخر سنة و يمكن ديه تبقى اخر مرة نطلع مع بعض!!!
طبعا ما رضتش اعلق و قلت لهم : هافكر و اقول لكم.
لما و صلت البيت قعدت افكر و افتكرت اخر رحلة طلعتها من 4 سنين و قتها كنت في بني سويف (راجع الجزء الاول) و كان برنامج الرحلة (سينما, دريم بارك, الحسين) و طبعا الرحلة كانت منحوسة نحس غير عادي ( مش عارف ليه) لدرجة ان احنا حمدنا ربنا ان دريم بارك ما ولعتش في اخر اليوم.
اول حاجة حصلت ان فيه اتوبيس عطل و اتاخرنا عن السينما واتلغيت من البرنامج, و بعدين لما روحنا دريم بارك روحنا متاخرين و كان فيه مشاكل في التذاكر فالطلبة ملحقوش يستمتعوا بالرحلة , و بعدين في الحسين مالقيناش مكان نقعد و كنا هنلغيها لولا واحد صعبنا عليه و قعدنا عنده في القهوة.
كل ده عدى قدامي زي ما يكون شريط فيلم سينمائي و قلت بلاش اطلع الرحلة ديه عشان الناس عايزة تنبسط, كلمت اصحابي و قلت لهم: مش طالع.
اليومين اللي بعد كدة اصحابي اكلوا دماغي عشان اطلع معاهم لدرجة ان وافقت اطلع انتقاما منهم!!!!!!
المهم حجزت في الرحلة اللي كانت طالعة راس سدر و استعدينا للرحلة اللي كانت يوم جمعة.
يوم الخميس باليل و قبل ما ننام بفتح التلفزيون لقيت نشرة الاخبار بتعلن عن تفجيرات طابا و ان فيه جماعة ارهابية فجرت فندق هيلتون طابا بدون سبب واضح ( اهلا بالنحس اهلا)
تاني يوم الصبح روحنا الكلية عشان نركب الاتوبيسات و نروح راس سدر و سمعنا اقتراح بيقول نلغي الرحلة عشان القلق اللي حاصل في سيناء و الناس اعترضت طبعا و قالوا :لا نطلع الرحلة. ( هما اللي جابوه لنفسهم)
طلعت الرحلة و كان المفروض في الطريق نعدي على ال dj و ناخده معانا في الاتوبيس بس للاسف الراجل اتاخر و انتظرناه ساعة ( من الاول تاخير كده)
المهم ابتدينا نتحرك و اخنا متاخرين اصلا, و في الطريق اتوبيس عطل (مش اللي انا ركبه, قلت الحمد لله مش انا المرة ديه) طبعا كملنا و مالناش دعوة باللي عطلوا دول.
و بعد معاناة وصلنا راس سدر متاخرين الساعة 2 ظهرا تقريبا , و كانت المفاجأة ان القرية السياحية اللي كنا حاجزين فيها طلعت تحت الانشاء و لاول مرة اشوف شط متسفلت زي الشوارع ( الظاهر كانوا عايزين يعملوا شاطئ السيارات زي سينما السيارات كده) و بعد خناقة كبيرة بين المنظمين للرحلة و اصحاب القرية اتفقنا عل ان احنا نسيب القرية ديه و نروح قرية تانية جنبها على طول.
و هنا (كالعادة) ظهرت مشكلة جديدة ان فيه اتوبيس راح يجيب الناس اللي اتوبيسهم عطل في اول الطريق (ياه كنا نسيناهم) يعني اللي راكبين في 4 توبيسات هيركبوا في اتنين دلوقت!!!!!!
و بعد خناقات و مناقشات وصلنا القرية الجديدة الساعة 5 , قلنا ننسى اللي فات و نبتدي الرحلة بقى.
حصلت مشكلة جديدة ( انا زهقت بقى) خناقة بين اتنين من الطلبة و اصحاب كل واحد دخلوا الخناقة و كان موضوع كبير و دم و كده, فالقرية قررت طردنا منها , بس الحمد لله قدرنا نسيطر عل الموضوع و نقنع القرية انهم يعدوها المرة ديه ( طبعا بعد كدة عرفنا ان القرية قررت عدم استضافة اي رحلة طلابية تاني)
الساعة دلوقتي 7 و لسة معملناش اي حاجة خالص, المهم قولنا ننزل البحر بس طبعا الدنيا كانت بقت ظلام و باليل فا محدش نزل بحر و لا حاجة.
ال DJ ابتدى و الناس ابتدت تنسى همومها و حطوا همهم في ال DJ , و فجأة الساعة 9 : مكالمة من مجهول (مش انا و الله) بتقول ان فيه تفجيرات جديدة حصلت في شرم الشيخ و لازم نروح قبل ما يقفلوا سيناء!!!!.
طبعا كل الناس طلعوا يجروا على الاتوبيسات بس لسة في واحد عطلان يعني لازم نركب فوق بعض قصدي مع بعض.
ابتدينا نتحرك الساعة 10 يعني المفروض نوصل 1 صياحا بس طبعا كالعادة و صلنا الساعة 4 صباحا يا ترى ليه؟؟؟؟؟
انا اقولكم ليه اصل الاتوبيس اللي كنت راكبه الفرامل فيه سابت و خرطوم البنزين اتقطع و السواق نام و هو سايق ( يعني كل حاجة سليمة بس مستقلة بذاتها)
كفاية كدة عليكم النهاردة مع وعد باني احكي حكايات تانية بعدين.

لو لسة فاكر نفسك منحوس.......استنى مغامرات عبده منحوس مع الجيش في القريب العاجل.

عبده منحوس: هشام طه شعبان

3abdo man7os part 1

( قصة حقيقية 100% وبالمستندات)

فاكر نفسك منحوس........حاسس ان دايما حظك وحش.......ساعات تفتكر ان الدنيا مقفلة معاك ......طب انا هاحكيلك حكاية بسيطة من حكايات كتير بتحصل في حياتي كل يوم و قارن بينها و بين نفسك و قولي ايه رأيك.
الزمان: بعد طلوع نتيجة الثانوية العامة مباشرة.
الابطال: انا ووالدي و كمبيوتر مكتب التنسيق و عامل تصوير الورق في الكلية و موظف التحويلات في جامعة الزقازيق.

الاحداث: خلاص بعد سنتين عذاب خلصت الثانوية العامة و النتيجة طلعت و الحمد لله جبت 95.5% و مبسوط اخر انبساط , و فجأة اخدت الصدمة المجاميع السنة ديه عالية جدا و احتمال مالحقش كلية من كليات القمة ( ديه كانت حسابات والدي) و فكرت في البديل لقيت ان مافيش احسن من تجارة انجليزي (بناتها حلوة .....قصدي مستقبلها حلو ).
ابتدينا نكتب الرغبات و كتبناها حسب البلاد يعني ( طب القاهرة و صيدلة القاهرة و طب اسنان القاهرة و طب اسكندرية و صيدلة اسكندرية و هكذا.....) مش عارف ليه صراحة بس اللي حصل, و بعد لما خلصنا كل كليات القمة كتبنا تجارة زي اتفاقنا.
و اخيرا يوم الحسم, يوم نتيجة التنسبق, صحيت الصبح من النوم على تليفون من والدي قالي: اتصل يا بني بالرقم ده و دخل رقم جلوسك هيقولولك روحت فين , قلتله : حاضر, و اتصلت فعلا و سمعت النداء الالي بيقول: لقد تم ترشيحكم الى كلية تجارة القاهرة!!!!!!!!!.
قلت الحمد لله على كل شيء و كلمت والدي قلتله, بعد شوية كان فيه مؤتمر صحفي لوزير التعليم العالي بيقول فيه نتيجة التنسيق , و كانت المفاجأة ان انا مجموعي جايب طب اسنان القاهرة و كذا كلية صيدلة كمان !!!!!!!, طبعا كانت صدمة وما بقتش فاهم حاجة منين انا جايب مجموع طب اسنان القاهرة و منين انا اترشحت لتجارة!!!!!, كلمت والدي قلتله قالي : متأكد , قلتله :طبعا , قالي : طيب استنى شوية.
و بعد ساعة عدت زي لما تكون سنة اتصل بيا و قالي ان احنا عندنا ميعاد مع مدير مكتب التنسيق النهاردة.
روحنا لمدير مكتب التنسيق و الراجل كان مستغرب جدا و قال: ديه غالطة بتحصل لواحد في المليون!!!!!! , و بعد الفحص اكتشفنا ان هناك كود يضاف في بداية رقم الجلوس ليدل اذا ما كان الطالب علمي او ادبي و للاسف اللي دخل بيناتي دخلني اني ادبي مش علمي فطبعا الكمبيوتر استغرب و قال ايه الطالب الغبي ده ادبي و كاتب اول 32 رغبة طب و صيدلة يا عم ارميه في تجارة ده غبي ( طبعا انا اللي كان مزعلني هو ان شكلي قدام الكمبيوتر بقى وحش جدا) , المهم عدلنا جواب الترشيح لكلية طب اسنان القاهرة و خلاص.
بعدها بيومين والدي قالي : انت مش كان نفسك تخش كلية صيدلة , قلتله: ايوه , قالي : طب ما تيجي نحول , قلتله : ماشي , و بعد فحص كليات صيدلة اللي مجموعي جايبها لقينا ان احسن اتنين هما كلية صيدلة الزقازيق و كلية صيدلة بني سويف و بعدين قررنا ان احنا نروح الزقازيق.
و فعلا روحنا نحول هناك( و لاول مرة في حياتي افهم يعني ايه بيروقراطية و روتين) الموظف المسئول عن التحويل قابلنا و قالي: انت ايه اللي جايبك هنا اتفضل روح بلدك احنا مش هنقبل غير ابناء الشرقية ( تقولش الشرقية ديه برة مصر) حتى لو مجموعك اكبر منهم, و بعد خناقة كبيرة اقنعوه ولاد الحلال انه ياخد الورق مني و يبقى يرميه بعد كده مش مهم, و خد الورق مني فعلا.
و فات وقت كتير جدا و لسة مافيش خبر عن النتيجة لحد قبل الدراسة باسبوع طلعت نتيجة ما قبلش فيها غير ابناء الشرقية فعلا , و كان فيهم ناس جايبين مجموع اقل مني!!!!!!!!, طبعا فقدت الامل و قلت خلاص احول بني سويف , روحت هناك و حولت في خلال يومين بالضبط و خلاص الملف بتاعي راح هناك , وفي نفس اليوم اللي راح فيه الملف طلعت نتيجة تانية في الزقازيق و طلع اسمي مقبول فيها بعد لما خلاص ما بقاش ينفع تحول تاني!!!!!!! (لا تعليق) .
رضيت بحالي و قضيت السنة في بني سويف و خلصت السنة قلت احول القاهرة بقى و الحمد لله كنت جايب جيد يعني مافيش حجة .
روحت قدمت ورقي و كان فيه ناس مقدمين جايبين مقبول كمان , وعدت الاجازة و جيه يوم الخميس اللي قبل الدراسة على طول و المفروض ان النتيجة طالعة النهاردة , صحيت الساعة 5 الفجر على خبر حالة وفاة في البلد و لازم نسافر دلوقتي عشان نحضر الدفنة و العزاء (طبعا انا كنت متفائل جدا !!!!!!!!!!).
وبليل كلمت واحد صاحبي من البلد قلتله :- ها يابني ايه النظام؟
- والله يا هشام انا مش عارف اقولك ايه احنا ما لاقيناش اسمك في كشف المقبولين.
- يابني مش ناقصة تهريج و حياتك.
- يا عم والله ما بهرج.
- طب الناس اللي كانوا جايبين مقبول عملوا ايه؟
- كلهم قبلوا.
طبعا قعدتلي يومين لحد الدراسة مكتئب و زعلان لحد لما جيه يوم السبت اول يوم في الدراسة, قلت اما اروح اشوف اسمي بنفسي.
روحت و فعلا ما لقيتش اسمي , قلت طب لما اطلع اسئل في شئون الطلبة و بعد ساعتين انتظار جيه مدير شئون الطلبة .
- لو سمحت حضرتك انا اسمي ما نزلش في المحولين.
- معلش يابني المرة الجاية بقى.
- بس فيه ناس تقديرهم اقل مني و حولوا!!!!!!.
- ادي الله وادي حكمته.
- طب مافيش وسيلة اعملها يمكن احول.
- لا والله.
- طب ممكن ابص بصة على الكشوفات اللي عندك؟
- ماشي
و بعد 20 دقبقة من البحث في الكشوفات لاقيت ورقة ما فيهاش غير اسمين ( انا و بنت الظاهر حظها زي حظي) و العامل نسي يعلقها مع باقي الورق (ياترى ايه السبب؟؟؟؟)

يا ترى لسة شايف نفسك منحوس ؟.........خلاص استنى المرة الجاية هاحكيلك حاجة نحس اكتر من كدة.
عبده منحوس
قصدي: هشام طه شعبان