أهلا....اخبارك ايه؟......من زمان لم نتقابل .....فاكراخر مرة كلمتك فيها عن الرحلة الجامدة جدا اللي طلعتها...المرة ديه هحكيلك حكاية جد لا يوجد بها ضحك خالص بس نتفق من الاول من غير ضحك!!!!!
المرة ديه مش هقوللك زمان ومكان و ابطال ,,, خلينا ندخل في الموضوع على طول.
كلية الصيدلة....كلية قمة....هتلاقي شغل على طول....و تبقى دكتور بقى......الكلام ده اللي كان بيقوله ليا اهلي و كل اللي حوالية و انا في ثانوية عامة و الفكرة دخلت دماغي و كبرت لحد لما دماغي صغرت عليها (هاهاهاهاهاهاهاهاهاهاهاها).
ذاكرت و اطحنت و دخلت كلية الصيدلة (طبعا بعد معاناة, راجع الجزء الاول), و لما دخلت قلت خلاص بقى هبقى عالم و صيدلي كبير و اركب و اكتشف ادوية و كدة و بتاع.
و بعدين يا خويا اكتشفت ان الموضوع مش بالسهولة ديه لا ده تقريبا مستحيل انك تعمل كدة في الوقت الحالي (على الاقل في مصر) الفرصة الوحيد للشغل هي بقال يعني بالظبط تقعد في الصيدلية تحلق على الزباين و تشوف كل واحد عايز ايه و تحاول تديله اكبر كم ممكن من الادوية اللي هتفيده و الل مش هتفيده.
مثال توضيحي (لمن يهتم بهذه الوظيفة): واحد دخلك صباع رجله الصغير بيوجعه ( خللي بالك انه الصغير مش الكبير) تعمل ايه؟؟؟؟
ا- تديله اغلى مسكن موجود عندك. ب- تديله حبوب منع الحمل. ج- تديله مبيد حشري.
د- تديله سندويتش جبنة رومي. ه- جميع ما سبق.
بص يا سيدي انا في الاول كنت فاهم اني هديله مسكن و خلاص بس بعد كدة فهمت ان الاجابة الصحيحة (ه) جميع ما سبق. ليه بقى,, انا اقولك ليه:
- تديله مسكن عشان الوجع يخف (ولازم يكون غالي عشان احنا مش فاتحين تكية, لا ديه صيدلية محترمة عايزة تكسب).
- تديله حبوب منع الحمل عشان تبقى بتنفذ سياسة الدولة العليا في تحديد النسل و بعدين محدش ضامن نفسه (و عشان ماما كريمة تنبسط منك)
- تديله المبيد الحشرى عشان ده صباعه الصغير و مش هيعرف يحمي نفسه من الحشرات اللعينة (شوية حنان بقى...انت ايه قلبك حجر؟) .
- سندويتش الجبنة الرومي عشان ما تبيقاش حرمته من حاجة يا معلم.
على فكرة انا ملاحظ انك عمال تضحك, بطل ضحك و ركز عشان الموضوع هيحلو اكتر.
المهم قولت ما باليد حيلة لجرب و اشوف ايه النظام وكان طبعا التدريب الصيفى هو فرصتي الذهبية للاكتشاف:
- ابتديت بصيدلية عادية و كانت صيدلية جامدة (مبيعاتها كتير طبعا) و اول حاجة اتعلمتها ان اللي انا اخدته في الكلية كله كوم و الشغل كوم تاني خالص (على الاقل ماخدناش نظرية الجبنة الرومي) المهم روحت هناك يوم واحد ,بس شوفت فيه اللي ماشوفتوش طول عمري :
الصيدلي لابس شبشب في رجليه و بيطبق نظرية تشتغل معايا حبة اديلك من عندي محبة (نظرية جامدة جدا) و معاه شوية عمال مش عارفين اي حاجة في اي حاجة و عشان تعرف انا قصدي ايه هسيبك مع الجو هناك:
- الدكتور: ياد يا عبعزيز ادي الحاجة اللي واقفة اويصين (ملحوظة: الدكتور الدغ) للصداع عشان واقفة بقالها كتييي.
- العامل : حاضر يا ابو الدكاترة بس اخلص الزبون اللي معايا (ملحوظة:العامل عربجي).
- ياد انجز ياد خيييك خفيف كدة.
- يا دكترة يعني اقطع نفسي يعني ........(و لحد هنا و الرقابة لازم تتدخل)
- ماعلينا , قلت اجرب صيدلة المستشفيات , و لاقيت الموضوع اظرف شوية (رغم ان الصيدلي هناك مكروه جدا من كل المستشفى) و في يوم من الايام دخلنا واحد كان لسة خالع ضرسه (بالظبط وحيد قرن خالع القرن بتاعه) و الراجل ده كان تبع التامين الصحي و كان مكتوب له مضاد حيوي و عايز ياخده بس المشكلة انه قبل ما يخلع على طول لسة واخد نفس الدواء و العلبة لسة فيها اللي يكفيه لنهاية العلاج (من الاخر ما ينفعش اديله الدواء) المهم قعدت نصف ساعة اشرحله لحد لما تقريبا مفعول البنج خلص و مرة واحدة الراجل قرر يضربني و دماغه و الف جزمة لازم يضربني طبعا كنت هطحنه لولا ان فيه كونتر خشب كبير بيني و بينه فمعرفش يطولني. . (ديه بالذات اوعى تضحك فيها).
- خلاص بقى مش فاضللي غير حاجة اجربها و بعد كدة مش عارف اعمل ايه, الدعاية الطبية, روحت شركة دواء في الاجازة و اتدربت معاهم و نزلت المنطقة اللي انا مسكها عشان ابيع فيها و لاول مرة اكتشف ان الدنيا مش صغيرة زي ما انا متخيل لا ديه كبيرة اوي اوي , كل يوم بتقابل اشكال و الوان من الصيادلة اللي عايز ياخد منك عينات مجانية على قد ما يقدر , واللي يقوللك همشيللك الدواء بتاعك بس ابقى شوفني, و اللي مش فاهم يعني ايه دواء اصلا و في يوم دخلت لصيدلي و معايا عروض الشركة عملاها (اكواب و مراوح و كدة) و لما الراجل شفهم عنيه احمرت و قال:
- الكلام ده يا بابا تضحك بيه على واحد لسة ابن امبارح انما انا (أرش) السوق كويس و عارف خبيااه ,ده انت ناقص تسرح بفلايات و امشاط و ........... (برضه الرقابة لازم تدخل)
طب و الحل انا خلاص تقريبا اتخرجت و لازم ابتدي الشغل و لسة مش عارف اشتغل ايه :
- اشتغل بنظرية الجبنة الرومي : بس الموضوع محتاج تفكير وهمي.
- اجيب شبشب : بس ده ممكن يعملي كاللو في رجلي (لان راحتك تبدا من القدمين).
- مستشفى: لازم الاول العب شوية GYMعشان الامر مايسلمش.
- الدعاية: لازم ابقى مدقدق و مقطع السمكة و ديلها (وانا ما بحبش السمك اصلا).
و عشان انا ماليش في الجبنة الرومي و مش برتاح في لبس الشباشب و مبحبش السمك و كمان عشان لو قعدت العب GYM بكوزين السمنت و عصاية الغليا اللي عندي عمري مهتغير فا........
على فكرة انا شايفك طول القصة عمال تضحك وعقابا ليك مش مكمل.....يلا سلام.
عبده منحوس
